Nhar it-Tlieta 8 ta' Ġunju, ir-Rappreżentanti tal-KSU Karl Agius, Rachel Cassar u Matthew Bonett attendew għal laqgħa ta' konsultazzjoni organizzata mis-Segretarjat Parlamentari responsabbli mit-Turiżmu, l-Ambjent u l-Kultura li fiha kien diskuss l-abbozz tal-Politika Kulturali Nazzjonali.

Diversi kelliema minn oqsma differenti, b'mod partikolari mill-qasam teatrali u edukattiv, taw il-kummenti tagħhom fuq l-abbozz ta' din il-politika u fuq dak li jaħsbu li għandu jkun inkluż fih u enfasizzat aktar f'dan il-qasam.

Il-KSU ħa l-opportunità li jressaq il-kontribut tiegħu għal dan l-Abbozz permezz ta' preżentazzjoni mogħtija matul din il-laqgħa ta' konsultazzjoni. Id-dokument tal-KSU ħadem fuqu l-kumitat apposta (ad hoc) tal-Kultura li kkonsista minn 10 studenti minn oqsma differenti tal-għaqdiet studenteski; wara li saret sejħa pubblika għal dawk interessati li jieħdu sehem. Imbagħad, xogħolhom għadda għand l-eżekuttivi tal-għaqdiet studenteski tal-kampus kollha, u wara kien approvat mill-Kummissjoni tal-Politika Soċjali.

Is-suġġetti ttrattati inkludew:

• L-importanza tal-Edukazzjoni bħala Pilastru tal-Qasam Kulturali
• Dimensjoni internazzjonali lill-Edukazzjoni Kulturali
• Iċ-Ċensura
• Politika Nazzjonali għal Komunità Nazzjonali
• Atteġġjament Sinerġetiku

Il-KSU jenfasizza wkoll l-importanza tal-ħolqien ta' skadenzi xierqa għall-implimentazzjoni ta' dan il-politika. B'hekk ikun żgurat li din issarraf tassew fi proġetti u inizjattivi konkreti. Il-KSU jemmen li dan hu dokument ta' politika kruċjali, meta tqis li l-qasam kulturali għandu jieħu l-importanza li jixraqlu ladarba dan jirrifletti l-ħajja ta' nazzjon.

Dan id-dokument intbagħat ukoll lill-On. Mario De Marco bħala l-kontribut tal-KSU għall-Abbozz tal-Politika Kulturali Nazzjonali.